ஒரு மனிதன் உயிர் வாழ்வதற்கு அடிப்படைத் தேவைகளான உணவு, உடை, உறைவிடம் எவ்வளவு முக்கியமானதோ அதே போல கல்வி அறிவும் மிகவும் அவசியமாகும். ஒவ்வொருவருக்கும் கல்வி கற்கும் உரிமை உள்ளது. பிள்ளைகளுக்கு கல்வி அறிவைக் கொடுப்பது பெற்றோரின் கடமையாகும். மாணவர்களுக்கு பிழையில்லாது சரியான முறையில் கல்வியையும் ஒழுக்கத்தையும் புகட்டுவது ஆசிரியரின் கடமையாகும்.
கல்வியினால் கிடைக்கும் பயனைப் பெறுவதற்கு கற்றால் மட்டும் போதாது. கற்றவற்றை பின்பற்றி வாழவேண்டும். இதனை திருவள்ளுவர் பின்வரும் குறளின் மூலம் சுருக்கமாகக் கூறுகிறார்.
“கற்க கசடறக் கற்பவை கற்றபின்
நிற்க அதற்குத் தக”.
இந்தக் குறள், கற்கவேண்டிய கல்வியை குற்றமறவும் முழுமையாகவும் கற்க வேண்டும் என்றும் அவ்வாறு கற்ற பிறகு கற்றதற்கேற்ப நல்வழி நடக்கவேண்டும் என்றும் கூறுகிறது.
கல்வி,
எமது இலக்கை அடைய வழிநடத்துகிறது.
நல்லவற்றையும் தீயவற்றையும் பிரித்தறியும் ஆற்றலைத் தந்து நல்லவனாகவும் வல்லவனாகவும் வாழ உதவுகிறது.
சுற்றுச்சூழலின் சுத்தம், நோய்கள் பற்றிய விழிப்புணர்வைத் தந்து எமக்கு ஆரோக்கியத்தையும் பாதுகாப்பையும் தருகிறது.
பதவியைத் தந்து அதன்மூலம் வருமானத்தை ஈட்டித்தந்து வளமாக வாழ உதவுகிறது.
ஏமாற்று உலகில் நேர்மையான உழைப்பிற்கு வழிகாட்டுகிறது.
உழைத்த செல்வத்தை பாதுகாப்பதற்கு புத்திசாலித்தனத்தை தருகிறது.
துன்பங்களிலிருந்து பாதுகாப்பாக தப்பிக்கும் வழிகளை ஆராய வைக்கிறது.
வாழ்க்கையில் பிடிப்பையும் நம்பிக்கையையும் கொடுக்கிறது.
மொத்தத்தில் கல்வி அறிவு நாட்டுக்கு ஒரு நல்ல பிரஜையை உருவாக்குகிறது.
குற்றமறக் கற்ற கல்வியின்படி நாம் ஒழுகுவோமே ஆயின் எமது முயற்சிகள் யாவும் எமக்கு வெற்றியையே தரும் என்பது திண்ணம்.
*****